又一個感人嘅父幹故事

呢個周末見到有單新聞，有一位慈父，因為”個仔鍾意何文田”，所以俾左140萬首期，幫個仲讀緊嘅大學嘅仔仔，買左間1400萬嘅樓。到底呢個老豆係真心定靠害呢？我地逐樣分析下。

首先下慈父講嘢真唔真。論按揭，2月28號之後，首置+自住物業最多可以借9成，不過要用埋HKMC，但實際樓價要1000萬以下，1400萬最多只能夠借8 成，即係如果呢位爸爸唔係借財仔plan 的話，佢一係抬足至少280萬做首期，一係等撻訂啦。(今年撻訂唔少咖)

再講，依家係少左壓力測試，但借錢都仲係要審批，銀行都驚借俾你無錢還，1400萬，借9 成，30年期，每個月要供6 萬多啲，月入要求最少要12萬5。邊度搵到個未畢業嘅大學生一個月搵10 幾萬？除非老豆幫手供，否則好大機會係假入息，我就唔建議咁做啦。

借9 成，即係用左9 倍槓桿，雖然一升就放大升幅，但係慈父自己都唔睇好，點解仲咁博呢？即係個市跌一成就負資產，雖然話間樓老豆送俾個仔，同埋有機會係自住，但係如果附近啲新盤突然又深水炸彈價促銷，一炸就又變負資產，到時點會唔影響心情呢？

從另一個角度講，呢單deal 抵唔抵做？如果以租值計，新樓左扣右扣都係唔夠3 %，但何文田區，1400萬左右嘅中年洋樓，地方大啲，至少gen 到4%回報，呎數、租金都大一截，無論自住放租都有更好。唔買樓，攞200萬幫個仔收下息又得唔得？當你買最穩陣嘅債6%，一年出6萬，個個月等於多5000蚊俾個仔學下投資，或者用嚟自我增值，點都好過要佢頂多條千幾萬嘅LOAN 啦﹗