今時今日摸貨仲有無得諗？

有朋友見近期成日有人講摸貨，又想我講下。

其實摸貨就係指你買入一個單位，首先簽臨約，俾左少少訂金，在正式成交之前，已經搵到另一個買家，加少少價賣俾佢，呢個成交入面，你嘅角色係叫確認人，英文係 confirmor，所以一般稱為”摸(Mor)貨”。

由於你只係俾左少少訂金，而由簽臨約到摸出件貨，一般唔會多過三個月，所以過去係唔少人以小博大，短炒嘅手段。摸貨最旺係1997 年前後。仲記得有一次同一位專做物業買賣的律師朋友飲茶時，佢講過俾我聽過當年試過一件貨，摸左8 次，而當時8 個律師圍位一張枱輪住簽名同準備買賣文件，簡宜何其壯觀﹗

至於我自己，沙士先開始買樓，果時已經少左摸貨活動，不過最記得曾經有個單位持有左幾年，升左幾倍，好開心咁賣俾人，隔左半個月又見到人加價10%賣返出去，再諗返買賣嘅流程，原來自己間樓都係俾人睇中左短炒變左摸貨﹗不過無所謂啦，錢又搵唔曬，留返啲水位俾人，反正自己賣一間嘅錢再買多兩間，之後雙倍升值﹗哈哈。

時而世易，當年炒樓氣氛熾熱，氣氛真係好重要。同一時間，當年的印花稅係成交先俾，成本又低啲。加上果時樓價好低，即使要俾印花稅都係一兩百蚊，經紀佣亦都係幾千蚊，依家買一間樓印花稅連埋佣無十萬八萬都走唔甩。當然，最重要係當時無論經紀、律師、Banker都好專業，有曬默契，先至會有一班律師圍埋做deal 嘅盛況。但係自從2010 SSD推出，摸貨絶跡市場十幾年，十幾年足足一個世代，依家後生果班隨時無人知要點做，所以銀行唔support 做摸貨按揭其實合情合理，因為依家跟本做唔到。

從結論來講，摸貨基本上已經唔可行，以小博大呢個statement 已經唔成立，就算真係做，都只算係短炒，有眼光嘅話幾個月炒一轉理論上都可以，但係只適合有一定財力，而且有一定經驗嘅朋友，因為一旦你沽唔出，就要短炒變長揸，就算上到會，如果個個月租冚唔到供的話，就個個月要貼錢供樓，一間半間都唔大問題，如果好似市場傳聞咁係大手買家，個個月倒貼十間八間，相信唔夠財力好快會乾塘。一句講曬，既然銀行都封左摸貨按揭呢隻門，新手投資者千祈咪亂試，唔好人衝你又衝，想投資增值，都係多啲聽下我講嘅分享，做好被動收入啦﹗

#物業理財#博收購#舊樓#重建#港樓變薪術#穩袋現金流#退休唔駛愁